Еліміздің әскери теңіз күштері өте шапшаң жүретін отандық жүрдек катермен толықты.Бүгін Ақтаудағы әскери айлақта сағатына 500 шақырым жылдамдықпен жүйткитін су көлігінің жалауы көтеріліп, ресми түрде қызметке кірісті. Катер Каспийдегі стратегиялық маңызды теңіз құрылымдарын, әскери порттарды күзетеді. Сондай-ақ екі тәулікке дейін ашық теңізге шығып, жорықта жүрген кемелерге азық-түлік пен қару-жарақ жеткізеді. Браконьерлермен күреске де шығады. Катердің басты артықшылығы – гидроакустикалық станциямен жарақтануында. Яғни су астынан келетін қатермен күресуге қауқарлы. 500 метрге дейінгі қашықтықта су астын сүзіп, қатердің бар-жоғын анықтай алады.Фархад Тагирбеков, ҚР Әскери теңіз күштері №2901 ӘБ бөлімше командирі:-Бұл – біздің тапсырыс бойынша алғашқы салынған катер. Оны Қазақстандағы Оралда орналасқан «Зенит» зауыты салды. Қазір ол бүкіл сынақтардан өтті және экипажы толықтай толтырылды. Экипаж құрамы – 5 адам. Бұл әскери катер диверсияға қарсы күштермен күресуші арнайы қарулармен қаруланған.Қазақстандық теңізшілер жеңіспен оралдыБүгін сондай-ақ «Теңіз кубогы – 2017» халықаралық жарысында 3-ші орын алған қазақстандық теңізшілер елге оралды. Ақтаудағы әскери теңіз айлағында олардың құрметіне Қазақстан әскери теңіз күштерінің жалауы салтанатты түрде көтеріліп, сарбаздар мен офицерлер сап түзеп жүріп өтті. Бакуде өткен жарыста Қазақстанмен қатар Ресей, Әзірбайжан мен Иранның әскери теңіз күштері 10 күн бойы түрлі сынақтан өтті. Теңіз биатлонында еліміздің намысын «Қазақстан» және «Сарыарқа» зымыранды-артиллериялық кемелерінің экипажы қорғаған болатын.